तिहेरी बॉम्बस्फोटप्रकरणी
आरोपीला १४ वर्षांनंतर जामीन
सकाळ वृत्तसेवा
मुंबई, ता. १० : मुंबईतील २०११ मधील तिहेरी बॉम्बस्फोट प्रकरणातील आरोपीला उच्च न्यायालयाने मंगळवारी (ता. १०) दीर्घकाळ तुरुंगवास आणि खटल्याला विलंब झाल्याच्या कारणास्तव १४ वर्षांनी जामीन मंजूर केला.
अर्जदार नदीम अख्तर शेख एक दशकाहून अधिक काळ तुरुंगात असून, नजीकच्या भविष्यात त्याविरुद्धचा खटला पूर्ण होण्याची शक्यता नाही, असे निरीक्षण न्या. अजय गडकरी आणि न्या. श्याम चांडक यांच्या खंडपीठाने जामीन मंजूर करताना नोंदविले. शेखला एक लाख रुपयांच्या वैयक्तिक मुचलक्यावर आणि त्याच रकमेच्या हमीदारांसह इतर अटींवर सुटका करण्याचे आदेश दिले. विशेष न्यायालयाने जामीन देण्यास नकार दिल्यानंतर शेखने जामिनाच्या मागणीसाठी मे २०२२मध्ये उच्च न्यायालयात धाव घेतली होती.
मुंबईत १३ जुलै २०११ला झवेरी बाजार, ऑपेरा हाऊस आणि दादर कबुतरखाना येथे तीन स्फोट झाले होते. त्यात २७ जणांचा मृत्यू, तर १०० हून अधिक जखमी झाले होते. या प्रकरणात तपास यंत्रणेने ११ जणांविरुद्ध आरोपपत्र दाखल केले होते. यूएपीए आणि मकोका संबंधित कलमांखाली आरोपींवर गुन्हा दाखल केला होता.