यंदा पावसाळ्यापूर्वीच
विद्यार्थ्यांना छत्रीवाटप
मुंबई, ता. १० : महापालिका शाळांतील आठवी ते दहावीच्या विद्यार्थ्यांना यंदा पावसाळा सुरू होण्यापूर्वीच छत्रीवाटप केले जाणार आहे. त्यासाठी पालिकेच्या मध्यवर्ती खरेदी विभागाने निविदा प्रक्रिया राबवली असून, २ मार्चला निविदा उघडण्यात येणार आहे.
महापालिकेच्या शाळांतील विद्यार्थ्यांना दरवर्षी गणवेश, बूट, बॅग इत्यादी २७ शालेय वस्तूंचे मोफत वाटप केले जाते; परंतु शालेय वस्तू वाटपात दरवर्षी उशीर होतो. यावरून होणारी टीका लक्षात घेत यंदा पावसाळा सुरू होण्यापूर्वीच छत्री पुरवठ्यासाठी निविदा प्रक्रिया राबवण्यात आली आहे.