निबंध स्पर्धेत मनोज कनोजिया प्रथम
मुंबई, ता. १४ ः महाराष्ट्र ऊर्जा विकास अभिकरणाच्या वतीने ऊर्जा संवर्धनावर आधारित राज्यस्तरीय निबंध स्पर्धेत पालिकेच्या शाळेतील विद्यार्थ्याने घवघवीत यश संपादन केले आहे. सांताक्रूझ पश्चिमेतील पालिकेच्या हिंदी माध्यमिक शाळेचा दहावीतील विद्यार्थी मनोज रामकिशोर कनोजिया याने स्पर्धेत राज्यात प्रथम क्रमांक पटकावला. स्पर्धेत नंदुरबार जिल्ह्यातील सुवर्णा पाटील या विद्यार्थिनीने दुसरा, अहिल्यानगर जिल्ह्यातील वेदांती वाणी या विद्यार्थिनीने तिसरा क्रमांक पटकावला. सर्वांगीण विकासासाठी विविध स्पर्धांमध्ये विद्यार्थ्यांचा सहभाग वाढविण्यावर शिक्षकांचा भर असतो, अशी माहिती शिक्षणाधिकारी सुजाता खरे यांनी दिली.