क्रांतिवीर लहुजी साळवे यांना अभिवादन
कल्याण, ता. १८ (वार्ताहर) : भारतीय स्वातंत्र्यलढ्यातील आद्य क्रांतिकारक आणि थोर समाजसुधारक क्रांतिवीर लहुजी साळवे यांच्या पुण्यतिथीनिमित्त मंगळवारी (ता. १७) कल्याण-डोंबिवली महापालिकेत त्यांना अभिवादन करण्यात आले. महापालिका मुख्यालयात आयोजित कार्यक्रमात महापौर हर्षाली चौधरी यांनी त्यांच्या प्रतिमेस पुष्पहार अर्पण करून आदरांजली वाहिली. याप्रसंगी पालिकेचे वरिष्ठ अधिकारी आणि लोकप्रतिनिधी मोठ्या संख्येने उपस्थित होते. अतिरिक्त आयुक्त हर्षल गायकवाड, उपायुक्त वंदना गुळवे, रामदास कोकरे, महापालिका सचिव किशोर शेळके आणि कार्यकारी अभियंता संदीप तांबे यांनी लहुजी साळवे यांच्या क्रांतिकार्याला उजाळा देत आदरांजली अर्पण केली. शिवसेना गटनेते विश्वनाथ राणे, नगरसेवक राजाराम पावशे, माहिती व जनसंपर्क अधिकारी माधवी पोफळे, सुरक्षा अधिकारी भरत बुळे यांच्यासह महापालिकेचे कर्मचारी, विविध सामाजिक संस्थांचे प्रतिनिधी आणि नागरिक या कार्यक्रमाला उपस्थित होते.

कार्याचे स्मरण
क्रांतिवीर लहुजी साळवे यांनी स्वराज्य रक्षणासाठी अनेक योद्धे तयार केले आणि समाजातील उपेक्षितांना एकत्र करून अन्यायाविरुद्ध लढण्याची प्रेरणा दिली. त्यांच्या याच गौरवशाली कार्याचे स्मरण करीत सर्वांनी त्यांच्या प्रतिमेस पुष्पसुमने अर्पण केली. या कार्यक्रमामुळे पालिका मुख्यालयात प्रेरणादायी वातावरण निर्माण झाले होते.