मालाडमध्ये पदपथावर दुचाकी चालवणाऱ्यांवर दंडात्मक कारवाई
मालाड, ता. १८ (बातमीदार) : मालाड पश्चिमेतील ओर्लेम आणि मीठ चौकी परिसरात पदपथावरून दुचाकी चालवणाऱ्या वाहनचालकांवर पोलिसांनी दंडात्मक कारवाई केली. दुचाकीस्वारांकडून वारंवार वाहतूक नियमांचे उल्लंघन होत असल्याच्या तक्रारी स्थानिकांकडून करण्यात आल्या होत्या.
सिग्नल टाळण्यासाठी किंवा झटपट मार्ग काढण्यासाठी अनेक जण पदपथावरून दुचाकी चालवत असल्याचे निदर्शनास आले. तसेच काही दुचाकीस्वार विरुद्ध दिशेने वाहन चालवत असल्याने पादचाऱ्यांना मोठा त्रास सहन करावा लागत होता. या प्रकारामुळे ज्येष्ठ नागरिक, विद्यार्थी आणि महिलांना जीव मुठीत धरून रस्त्यावरून ये-जा करावी लागत होती. काही प्रसंगी किरकोळ अपघातही घडल्याचे समोर आले आहे. या पार्श्वभूमीवर स्थानिक नागरिकांनी मालाड पोलिसांकडे तक्रार दाखल केली होती. तक्रारीची दखल घेत पोलिसांनी पदपथावरून दुचाकी चालवणाऱ्यांविरोधात कारवाई करत दंड आकारला. या कारवाईमुळे स्थानिक आणि पादचाऱ्यांना मोठा दिलासा मिळाला आहे. नागरिकांनी पोलिसांच्या या उपक्रमाचे स्वागत करत अशा प्रकारच्या कारवाया सातत्याने सुरू ठेवाव्यात, अशी मागणी केली आहे.