मुरबाड, ता. १९ (वार्ताहर) : तालुक्यातील शिरवळी (मा.) येथील शिवअरेश्वर मंदिर येथे महाशिवरात्री उत्साहात साजरी करण्यात आली. विविध धार्मिक कार्यक्रमांनी परिसरात भक्तिमय वातावरण निर्माण झाले होते. महाशिवरात्रीनिमित्त शिवलीलामृत पारायण घेण्यात आले. तसेच प्रजापिता ब्रह्माकुमारी ईश्वरीय विश्व विद्यालय (ओम शांती) यांच्या वतीने १२ ज्योतिर्लिंगांची स्थापना करून भाविकांना दर्शनाची व्यवस्था करण्यात आली. या वेळी आरोग्य, स्वच्छता, अध्यात्म आणि १२ ज्योतिर्लिंगांचे महत्त्व याबाबत मार्गदर्शन करण्यात आले. हजारो भक्तांनी दर्शन घेत उपवासाच्या फराळाचा लाभ घेतला. तालुक्यातील संगमेश्वर येथील मंदिर बंद असल्याने ‘प्रति संगमेश्वर’ लिंग दर्शनासाठी विशेषरित्या स्थापन करण्यात आले होते. यावेळी ठाणे जिल्हा परिषदेचे माजी उपाध्यक्ष सुभाष पवार यांच्यासह अनेक सामाजिक व राजकीय कार्यकर्त्यांनी उपस्थिती लावली. ह.भ.प. रामभाऊ दळवी यांच्या उपस्थितीत भाविकांनी दर्शन घेतले. कार्यक्रमामुळे संपूर्ण परिसर भक्तिरसात न्हाऊन निघाला होता.