‘मेट्रो १२’च्या विस्तारीकरणाची घोषणा
डॉ. श्रीकांत शिंदे यांच्याकडून विविध प्रकल्पांचा आढावा

सकाळ वृत्तसेवा
डोंबिवली, ता. २० ः कल्याण लोकसभा मतदारसंघाला मुंबई आणि नवी मुंबईशी जोडणाऱ्या वाहतूक सुविधांना मोठी चालना मिळणार आहे. मुंबई महानगर प्रदेश विकास प्राधिकरण (एमएमआरडीए)मार्फत उपमुख्यमंत्री तथा नगरविकासमंत्री एकनाथ शिंदे यांनी कल्याण-तळोजा ‘मेट्रो १२’च्या विस्तारीकरणाची घोषणा केली आहे. या प्रकल्पासाठी आठ हजार ४१४ कोटींची प्रशासकीय मान्यतादेखील देण्यात आली आहे. या पार्श्वभूमीवर विविध पायाभूत प्रकल्पांच्या प्रगतीचा आढावा खासदार डॉ. श्रीकांत शिंदे यांनी शुक्रवारी (ता. २०) घेतला.
‘मेट्रो १२ अ’ मार्गिकेची घोषणा झाली असून, लवकरच तिचा विस्तार केला जाणार आहे. ती कल्याण-शिळफाटा रस्त्याला समांतर धावणार असून कल्याण फाट्यावरून दहिसर मोरीमार्गे तळोजा मेट्रो स्थानकापर्यंत ही सेवा जाणार असल्याने, शिळफाटा मार्गावरील वाहतूक कोंडी कमी होण्याची शक्यता नागरिकांकडून वर्तवण्यात येत आहे.
................
मतदारसंघातील वाहतूक व्यवस्थेत गेल्या काही वर्षांत लक्षणीय सुधारणा झाली असून मेट्रो, रस्ते, उड्डाणपूल, उन्नत मार्ग आणि रेल्वे पूल अशा प्रकल्पांना गती मिळाली आहे. एमएमआरडीएच्या २०२६-२७ अर्थसंकल्पात विविध प्रकल्पांसाठी चार हजार ८९७.१९ कोटी रुपयांची तरतूद करण्यात आली आहे. पलावा उड्डाणपूल, तिसरा पत्रीपूल, वालधुनी नदीलगत उन्नत मार्ग आणि कल्याण रिंग रोड या कामांची पाहणीही यादरम्यान शिंदेंकडून करण्यात आली.
................
विस्तारित ‘मेट्रो १२ अ’ मार्गिका कल्याण- मानपाडा- काटई नाका- कल्याण फाटामार्गे विद्यमान लाइनला खुतारी गावाजवळ जोडली जाईल आणि तळोजा रेल्वे स्थानकापर्यंत जाईल. काटई नाका ते कल्याण फाटादरम्यान प्रस्तावित मेट्रो १४ सोबत कॉमन ट्रॅक व स्टेशन शेअरिंग होणार आहे. निळजे डेपो, मेट्रो १४ तसेच बुलेट ट्रेनच्या ठाणे स्थानकाशी जोडणीही प्रस्तावित आहे. याची एकूण लांबी १८.४ किमी असून सुमारे १०.५ किमीवर काम सुरू आहे. मानपाडा, काटई नाका, कल्याण ग्रोथ सेंटर, देसाई नाका, पडलेगाव, गोठेघर, दहिसर मोरी आदी भागांना या मार्गाचा लाभ होणार आहे.
...............
डबल डेकर उन्नत मार्गालाही मंजुरी
शिळफाटा ते भिवंडीजवळील राजनोली जंक्शनदरम्यान डबल डेकर उन्नत मार्गालाही मंजुरी देण्यात आली आहे. १९.४० किमी लांबीच्या या मार्गावर खालच्या स्तरावर रस्ता आणि वरच्या स्तरावर मेट्रो धावणार आहे. काटई नाका, पत्रीपूल, गोविंदवाडी बायपासमार्गे हा मार्ग उभारला जाणार असून त्याचा समावेश ठाणे- भिवंडी- कल्याण मेट्रो मार्गाशीही होईल. या सर्व प्रकल्पांमुळे ठाणे महानगर क्षेत्रातील प्रवास अधिक जलद आणि सुलभ होण्याची अपेक्षा व्यक्त केली जात आहे.
.....................
कल्याण ते तळोजा या ‘मेट्रो १२’ मार्गाच्या विस्तारीकरणाचा महत्त्वाकांक्षी निर्णय घेण्यात आला आहे. नव्या विस्तारित मार्गामध्ये कल्याण शिळफाटा रस्त्याच्या समांतर मार्गिका नेण्याचा महत्त्वाचा निर्णय घेण्यात आला आहे. त्यामुळे विस्तारित डोंबिवलीसह, मानपाडा, काटई नाका, ग्रोथ सेंटर, देसाई नाका, पडलेगाव, कल्याण फाटा, गोठेघर, दहिसर मोरी, दहिसरगाव, किरावली गाव, रोहिंजण, खुटारी गाव या भागातील प्रवाशांना याचा फायदा होईल.
- डॉ. श्रीकांत शिंदे, खासदार