ठाणे, ता. २१ (बातमीदार) : सामाजिक बांधिलकीची जाणीव आणि आरोग्य सेवेचा ध्यास यांचा संगम साधत शिवजयंती; तसेच संत सेवालाल महाराज जयंतीनिमित्त महाआरोग्य शिबिर उत्साहात पार पडले. दि ग्रेट सातारा सांगली सेवा समिती (रजि.) आणि डायसण फाउंडेशन (एनजीओ) यांच्या संयुक्त विद्यमाने; तसेच ठाणे जिल्हा सामान्य रुग्णालयाच्या सहकार्याने हा लोकहितवादी उपक्रम राबविण्यात आला.
शिबिराचे उद्‍घाटन जिल्हा शल्यचिकित्सक डॉ. कैलास पवार यांच्या हस्ते छत्रपती शिवाजी महाराज व संत सेवालाल महाराजांच्या प्रतिमेला गोर परंपरेनुसार भोग अर्पण करण्यात आले. या वेळी राम रेपाले (सचिव, शिवसेना), विजय यादव (अध्यक्ष, वाहतूक सेना ठाणे जिल्हा), पंकज सिरसाट (पोलिस उपायुक्त, वाहतूक शहर, ठाणे) यांची प्रमुख उपस्थिती लाभली. डायसण फाउंडेशनचे संचालक डॉ. अतुल तारासिंग राठोड, वैशाली राठोड, प्रकाश सूर्यवंशी (संस्थापक अध्यक्ष) आणि उत्तम सूर्यवंशी (अध्यक्ष, ठाणे जिल्हा) उपस्थित होते. महाआरोग्य शिबिरात सुमारे १७५ रुग्णांनी विविध तपासण्या व उपचारांचा लाभ घेतला. स्त्रीरोग, अस्थिरोग, बालरोग, नेत्र व दंत तपासणीसह रक्तदाब, साखर, कोलेस्टेरॉल, ईसीजी आदी तपासण्या मोफत करण्यात आल्या. नेत्रतपासणीनंतर पात्र लाभार्थ्यांना मोफत चष्म्यांचे वाटप करण्यात आले. तसेच ई-श्रम कार्ड व आयुष्मान भारत कार्ड नोंदणीसाठी नागरिकांनी उत्स्फूर्त प्रतिसाद दिला. जिल्हा सामान्य रुग्णालयातील ३२ डॉक्टर, तज्ज्ञ व कर्मचाऱ्यांनी सक्रिय सहभाग नोंदविला.