बालरुपी महापुरुष अवतरले भायखळ्यात
शिवडी, ता. २१ (बातमीदार) ः छत्रपती शिवाजी महाराज यांच्या जयंतीनिमित्त भायखळ्यातील भीमनगर येथील तरुणांनी वेशभूषा स्पर्धेचे आयोजन केले होते. या स्पर्धेत भीमनगरमधील चिमुकल्यांनी विविध महापुरुषांची रूपे साकारली होती. बाल कलाकारांनी साकारलेले ऐतिहासिक पात्र लोकांचे आकर्षणाचे केंद्रबिंदू ठरले. तसेच, तरुणांनी विद्यार्थ्यांना शालेय साहित्याचे वाटप केले. त्यांच्या या उपक्रमाचे परिसरात विशेष कौतुक होत आहे.
शिवजयंतीनिमित्त वेशभूषा स्पर्धेचे आयोजन करण्यात आले होते. या स्पर्धेत महिलांसह चिमुकल्यांनी मोठा सहभाग नोंदवला होता. या स्पर्धेमुळे यंदा बाल शिवाजी, डॉ. बाबासाहेब आंबेडकर, नेताजी सुभाषचंद्र बोस, राजमाता जिजाऊ, झाशीची राणी आदी महापुरुष बालरूपी भायखळ्यात अवतरल्याचा भास झाला. बाल कलाकारांनी साकारलेले ऐतिहासिक पात्र लोकांचे आकर्षणाचे केंद्रबिंदू ठरले. याप्रसंगी उपस्थितांच्या छत्रपती शिवाजी महाराज की जय, डॉ. बाबासाहेब आंबेडकरांचा विजय असो अशा घोषणांनी परिसर दणाणून गेला. दरम्यान, विजेत्यांना पारितोषिक वाटप करण्यात आले.