जुईनगर, ता. २१ (बातमीदार) : सिडकोच्या अनधिकृत बांधकामे विभागामार्फत सानपाडा नोड परिसरात शुक्रवारी (ता. २०) तोडक मोहीम राबविण्यात आली. या कारवाईदरम्यान सिडकोच्या अधिसूचित व संपादित जागेवरील सेक्टर पाचमधील भूखंड क्रमांक २१४ व २१४अ शेजारी, तसेच मौजे सानपाडा येथील सर्व्हे क्रमांक ५४/३, ५४/८ आणि ७६/६ मधील अंदाजे ८० चौ.मी. क्षेत्रफळावरील अनधिकृत बांधकामे हटविण्यात आली. ही बांधकामे सिडकोच्या नियमावली व धोरणांचे उल्लंघन करून, तसेच सिडको महामंडळ अथवा संबंधित प्राधिकरणाची कोणतीही अधिकृत परवानगी न घेता उभारण्यात आली होती. नियमबाह्य व बेकायदा स्वरूपामुळे ही बांधकामे निष्कासित करण्यात आल्याची माहिती अधिकाऱ्यांनी दिली. या कारवाईसाठी जेसीबी, तीन जीप आणि पाच कामगारांचा वापर करण्यात आला. मोहीम मुख्य दक्षता अधिकारी यांच्या निर्देशानुसार, तसेच मुख्य नियंत्रक, अनधिकृत बांधकामे (नवी मुंबई) यांच्या मार्गदर्शनाखाली पार पडली.