विद्यार्थ्यांचा महाराजांना मानाचा मुजरा

विक्रमगड (बातमीदार) : तालुक्यातील झडपोली येथील जिजाऊ अंध व मतिमंद मुलांच्या निवासी शाळेत महाराष्ट्राचे आराध्य दैवत छत्रपती शिवाजी महाराज यांची जयंती मोठ्या उत्साहात आणि आनंदात साजरी करण्यात आली. दिव्यांग विद्यार्थ्यांनी अत्यंत भावपूर्ण वातावरणात महाराजांना मानाचा मुजरा करत अभिवादन केले. कार्यक्रमाची सुरुवात दीपप्रज्वलन व महाराजांच्या प्रतिमेला पुष्पहार अर्पण करून करण्यात आली. विद्यार्थ्यांनी महाराजांच्या जीवनकार्यावर आधारित गीते, पोवाडे व प्रभावी भाषणे सादर केली. पाळणा गीत सादर करत त्यांनी आनंद द्विगुणित केला. शेवटी सर्व विद्यार्थ्यांनी महाराजांना साष्टांग दंडवत प्रणाम करून कृतज्ञता व्यक्त केली. या वेळी शिक्षकांनी विद्यार्थ्यांना छत्रपती शिवाजी महाराज यांच्या शौर्य, पराक्रम व स्वराज्य स्थापनेच्या कार्याविषयी मार्गदर्शन केले. कार्यक्रमाला महेश गायकवाड, जितेंद्र वाघ, राम गोविंद तसेच जव्हार बायफ संस्थेचे कर्मचारी विशाल करपे, रघुनाथ जगताप व त्यांचे सहकारी उपस्थित होते. शाळेतील शिक्षक व शिक्षकेत्तर कर्मचारी यांचीही उपस्थिती होती. कार्यक्रमामुळे विद्यार्थ्यांमध्ये देशभक्तीची भावना जागृत झाली असून जयंती सोहळा उत्साहपूर्ण वातावरणात संपन्न झाला.