नवी मुंबई (वार्ताहर) : दिवा येथून महापे येथे कामावर येणाऱ्या तरुणाच्या मोटारसायकलला भरधाव ट्रकने धडक दिल्याने झालेल्या अपघातात शिवम शिवकुमार जैस्वाल (वय २२) याचा मृत्यू झाला. तुर्भे पोलिसांनी ट्रकचालकाविरोधात गुन्हा दाखल करून त्याला ताब्यात घेतले आहे.

शिवम हा दिवा पूर्व भागात राहत होता. तसेच तो महापे येथील एका खासगी कंपनीत कामाला होता. रविवारी (ता. २२) सकाळी १०.३० वाजण्याच्या सुमारास तो मोटारसायकलवरून कामावर जाण्यासाठी निघाला होता. ११ वाजण्याच्या सुमारास शिळफाटा-महापे रस्त्याने जात असताना, महापे येथील एल ॲण्ड टी पुलाखालून इंदिरानगर तुर्भे एमआयडीसीच्या दिशेने तो वळण घेत होता. त्याचवेळी ऍपे सर्व्हिस सेंटरसमोर पाठीमागून येणाऱ्या ट्रकने त्याला धडक दिली. या अपघातात शिवम ट्रकच्या मागील चाकाखाली चिरडला गेल्याने त्याचा मृत्यू झाला. या घटनेनंतर पोलिसांनी ट्रकचालक अजय जैस्वाल (वय ३४) याला ताब्यात घेतले आहे.