वज्रेश्वरी, ता. २३ (बातमीदार) : पडघा परिसरात २० फेब्रुवारीला सायंकाळी सहा वाजण्याच्या सुमारास किरकोळ कारणावरून झालेल्या वादातून एका व्यक्तीला बेदम मारहाण केल्याची धक्कादायक घटना घडली आहे. मिळालेल्या माहितीनुसार, मनेश पाटील (वय ३५) हे नवीन घराच्या बांधकामासाठी स्लॅब व अन्य साहित्य खरेदीसाठी कारने शेडगावकडे जात होते. किरवली गावाच्या फाट्याजवळ रस्ता अरुंद असल्याने त्यांच्या कारचा कट कैलास पाटील व विनायक शिंदे यांच्या दुचाकीला लागल्याचे कारण पुढे करत शाब्दिक वाद झाला. त्यानंतर शिंदे यांनी शिवीगाळ करत मनेश पाटील यांना ठोशाबुक्क्यांनी मारहाण केल्याचा आरोप आहे. तसेच कैलास पाटील यांनी दांडक्याने मारहाण करून त्यांना जखमी केल्याचे तक्रारीत नमूद करण्यात आले आहे. या मारहाणीमध्ये मनेश पाटील गंभीर जखमी झाले. घटनेनंतर त्यांनी तत्काळ पडघा पोलिस ठाण्यात धाव घेत तक्रार दाखल केली. आरोपींनी मारहाण करून जीवे मारण्याची धमकी दिल्याचेही तक्रारीत नमूद आहे. याप्रकरणी पडघा पोलिस ठाण्यात कैलास पाटील व विनायक शिंदे यांच्याविरोधात गुन्हा दाखल केला असून पुढील तपास सुरू आहे.