डाॅ. पालवे आत्महत्या;
अनंत गर्जेला जामीन
सकाळ वृत्तसेवा
मुंबई, ता. २३ : पत्नीला आत्महत्येस प्रवृत्त केल्याचा आरोप असलेला भाजप नेत्या पंकजा मुंडेंचा स्वीय सहाय्यक (पीए) अनंत गर्जे याला सोमवारी (ता. २३) सत्र न्यायालयाने जामीन मंजूर केला. जामिनाच्या आदेशाची सविस्तर प्रत रात्री उशिरापर्यंत उपलब्ध झाली नव्हती. 
गर्जेची पत्नी डॉ. गौरी पालवे (२८) या महापालिकेच्या केईएम रुग्णालयात दंतवैद्य म्हणून कार्यरत होत्या. त्यांनी गेल्या वर्षी २२ नोव्हेंबरला मध्य मुंबईतील वरळीतील राहत्या घरी आत्महत्या केली होती. गौरी आणि गर्जेचे गेल्या वर्षी फेब्रुवारीत लग्न झाले होते. गौरीच्या मृत्यूनंतर त्यांच्या वडिलांनी केलेल्या तक्रारीवरून वरळी पोलिसांनी गर्जे, त्याचा भाऊ आणि बहीण यांच्याविरुद्ध आत्महत्येस प्रवृत्त केल्याच्या आरोपाप्रकरणी गुन्हा दाखल केला होता.  आपल्यावरील आरोप अस्पष्ट असून कारवाई दुर्दैवी घटनेनंतरच्या भावनिक तणावाचा परिणाम असल्याचा दावा गर्जेने जामिनाची मागणी करताना केला होता.

गर्जेची बहीण शीतल गर्जे-आंधळे आणि भाऊ अजय गर्जेंना कनिष्ठ न्यायालयाने याआधीच अटकपूर्व जामीन मंजूर केला आहे. त्या पार्श्वभूमीवर गर्जेने जामिनासाठी सत्र न्यायालयात अर्ज केला होता. अतिरिक्त सत्र न्यायाधीश रूपाली पवार यांनी गर्जेला जामीन मंजूर केला.