गिरणी कामगार संयुक्त लढ्यात खटाव मिल कामगारांचा सहभाग
शिवडी, ता. २४ (बातमीदार) : गिरणी कामगार संयुक्त लढा समितीच्या आंदोलनाला मिळत असलेले यश आणि मुंबईसह ग्रामीण भागातील कामगारांचा वाढता पाठिंबा लक्षात घेता पाटण-कराड येथील खटाव मिलमधील गिरणी कामगार संघर्ष समितीने संयुक्त लढ्यात सहभागी होण्याचा निर्णय घेतला आहे.
खटाव मिल संघर्ष समितीचे प्रमुख कार्यकर्ते राजेंद्र साखरे, बाळकृष्ण धनवट आणि सुहास देसाई यांनी आपल्या सहकाऱ्यांसह या लढ्यात सक्रिय सहभागाची घोषणा केली. परळ पूर्व येथील राष्ट्रीय मिल मजदूर संघ येथे शनिवारी संध्याकाळी आयोजित स्वागत समारंभात या तिघांचे संघाचे सरचिटणीस गोविंदराव मोहिते यांनी शाल व पुष्पगुच्छ देऊन स्वागत केले. या वेळी खजिनदार निवृत्ती देसाई, मारुती शिंत्रे यांच्यासह अन्य पदाधिकारी उपस्थित होते.
तिन्ही नेत्यांनी आपल्या कार्यकर्त्यांसह राष्ट्रीय मिल मजदूर संघाचे सदस्यत्व स्वीकारले. या वेळी बोलताना राजेंद्र साखरे यांनी सांगितले की, गिरणी कामगारांच्या घरांच्या प्रश्नावर संयुक्त लढ्याचे प्रमुख सचिन अहिर आणि निमंत्रक गोविंदराव मोहिते यांनी ठाम भूमिका घेतली आहे. त्यामुळे पाटण-कराड परिसरातील कामगारांनी मोठ्या संख्येने या लढ्यात प्रत्यक्ष सहभागी होण्याचा एकमुखी निर्णय घेतला आहे.