केळवेत मायबोलीचा जागर

पालघर, ता. २४ (बातमीदार) : आंतरराष्ट्रीय मायबोली दिनानिमित्त केळवेत मायबोलीचा जागर केला गेला. अनाम प्रेम या संस्थेच्या वतीने केळवे शितलादेवी मंदिराच्या सभागृहात रविवारी (ता. २२) जिल्ह्यातील स्थानिक बोलीभाषा संवर्धनाच्या दृष्टीने हा कार्यक्रम संस्थेने आयोजित केला होता.
पालघर आणि ठाणे जिल्ह्यातील कुपारी, वंजारी, वाडवळ, वारली, भंडारी, अहिराणी, खानदेशी, कुणबी, आदिवासी, आगरी, कातकरी अशा मायबोलीतून या वेळी संवाद साधत गाणी, कविता आणि साहित्याचे सादरीकरण करण्यात आले. या सादरीकरणात उपस्थितांना भाषा संस्कृती अनुभवायला मिळाली. या कार्यक्रमात लोप पावत चाललेले भोर नृत्य आदिवासी कलाकारांनी सादर केले, तर पालघरच्या कर्णबधिर शाळेतील विद्यार्थ्यांनी बिरसा मुंडा यांच्यावर आधारित लोककलेचे आदिवासी नृत्याचे सादरीकरण केले. या उपक्रमात भाषा संवर्धन आणि भाषेचे जतन यावर सखोल चर्चा झाली. गेल्या १९ वर्षांपासून अनाम प्रेम ही संस्था जागतिक मायबोली दिवस साजरा करत आहे.