खारघर, ता. २४ (बातमीदार) : तळोजा परिसरात सिडकोच्या जमीन वादाच्या पार्श्वभूमीवर बी. जी. शिर्के कंपनीच्या काही कामगारांकडून तिघा व्यक्तींवर लाकडी दांडका व लोखंडी सळईने हल्ला करण्यात आल्याची घटना उघडकीस आली आहे. याप्रकरणी पनवेल पोलिस ठाण्यात गुन्हा दाखल करण्यात आला असून, पोलिसांनी तीन संशयितांना ताब्यात घेतले आहे. पसार संशयितांचा शोध सुरू आहे.

तळोजा गावालगत पेंधर येथील ग्रामस्थ देविदास पाटील हे ९ फेब्रुवारीला तळोजा सेक्टर-३ मधील जमीन वादासंदर्भात सुनील कातारा आणि सचिन जाधव यांच्यासोबत चर्चा करत होते. या वेळी शिर्के कंपनीचा एक कामगार मोकळ्या जागेत शौचासाठी आला होता. संबंधित जागा खासगी असल्याचे सांगत पाटील यांनी त्या कामगारास तेथून जाण्यास सांगितले. यावरून संतप्त झालेल्या कामगाराने इतर साथीदारांना बोलावून घेतले. त्यानंतर त्यांनी एकत्र येऊन देविदास पाटील, सुनील कातारा आणि सचिन जाधव यांच्यावर लाकडी दांडका आणि लोखंडी सळईने हल्ला केला. या हल्ल्यात तिघेही गंभीर जखमी झाले असून, त्यांच्यावर खासगी रुग्णालयात उपचार सुरू आहेत.