नेरूळमधील पदपथाच्या कामाच्या गुणवत्तेची चौकशी करा
माहिती फलक नाही; नव्या कामाला तडे, डासांच्या प्रादुर्भावाने नागरिक त्रस्त
नेरूळ, ता. २४ (बातमीदार) : नेरूळ सेक्टर ६ परिसरात राजीव गांधी उड्डाणपुल ते पामबीच मार्गालगत विशाल सोफा आर्ट ते नेरूळ सी व्ह्यू सोसायटीदरम्यान सुरू असलेल्या पदपथाच्या कामाच्या गुणवत्तेबाबत चौकशी करण्याची मागणी शिवसेनेचे महादेव पवार यांनी महापालिका आयुक्तांकडे केली आहे. कामाच्या ठिकाणी आवश्यक असलेला माहिती फलक लावण्यात आलेला नसल्याने कामाचा निधी, कालावधी व स्वरूप याबाबत नागरिकांना कोणतीही माहिती मिळत नसल्याची तक्रार करण्यात आली आहे.
नुकतेच सुरू झालेल्या पदपथाला तडे गेल्याचे निदर्शनास आले असून कामाच्या दर्जाबाबत प्रश्नचिन्ह निर्माण झाले आहे. कंत्राटदाराने ठेवलेल्या पाण्याच्या टाकीत कचरा साचल्याने दुर्गंधी पसरली असून डासांचा प्रादुर्भाव वाढला आहे. त्यामुळे साथीच्या आजाराची भीती स्थानिक रहिवाशांनी व्यक्त केली आहे.
पालिका प्रशासनाने प्रत्यक्ष पाहणी करून माहिती फलक लावणे, कामाची गुणवत्ता तपासणे व पाण्याच्या टाकीची स्वच्छता करण्याचे तातडीने निर्देश द्यावेत, अशी मागणी करण्यात आली आहे.