जागतिक महिला दिनानिमित्त विविध कार्यक्रमांचे आयोजन
तुर्भे, ता. २४ (बातमीदार) : जागतिक महिला दिनानिमित्त नवी मुंबई महानगरपालिकेच्या समाज विकास विभागातर्फे महिलांसाठी विविध स्पर्धा व उपक्रमांचे आयोजन करण्यात आले असल्याची माहिती उपायुक्त संजय शिंदे यांनी दिली. नमुंमपा कार्यक्षेत्रातील महिलांसाठी ४ ते ६ मार्चदरम्यान समूह गायन, महिला भजनी मंडळ भजन, लघु व्हिडीओ, कोळी नृत्य, समूह नाटिका व मंगळागौर स्पर्धा आयोजित करण्यात येणार आहेत. या स्पर्धांच्या प्राथमिक व अंतिम फेऱ्या वाशी येथील महात्मा फुले स्मृती भवन येथे होणार आहेत.
८ मार्च रोजी विष्णुदास भावे नाट्यगृह येथे मुख्य कार्यक्रमात विविध क्षेत्रातील कर्तृत्ववान महिलांचा सन्मान, स्पर्धांचे पारितोषिक वितरण तसेच महिलांनी उत्पादित केलेल्या साहित्याच्या विक्रीसाठी मोफत स्टॉल उपलब्ध करून दिले जाणार आहेत. भावे येथील कार्यक्रमात पैठणी लकी ड्रॉही होणार आहे. स्पर्धांसाठी अर्ज करण्याची अंतिम तारीख २ मार्च तर पुरस्कार व स्टॉलसाठी ४ मार्च आहे. अर्ज समाजविकास विभाग व सर्व विभाग कार्यालयांत उपलब्ध आहेत.