कुडूस केंद्रावर भातखरेदी सुरू
वाडा (बातमीदार)ः तालुक्यातील कुडूस येथे आदिवासी विकास महामंडळाकडून धानखरेदी केंद्र सुरू करण्यात आले आहे. या केंद्रात तीन हजार २९४ क्विंटल भाताची खरेदी केली असून, ६९७ शेतकऱ्यांनी ऑनलाइन अर्ज करून ठेवल्याची माहिती केंद्रप्रमुख प्रदीप जाधव यांनी दिली.
आदिवासी विकास महामंडळाकडून वाडा तालुक्यातील गुहीर, कळंभे, गोऱ्हे, पोशेरी, परळी, सारशी, कुडूस, कोनसई व मानिवली या नऊ केंद्रांवर धानखरेदी केली जाते. कुडूस येथे पहिल्यांदाच केंद्र सुरू केले असून, त्याला शेतकऱ्यांचा चांगला प्रतिसाद मिळत आहे. आतापर्यंत तीन हजार २९४ क्विंटल भाताची खरेदी झाली असून, ६९७ शेतकऱ्यांनी ऑनलाइन भातासाठी अर्ज केले आहेत. परिसरातील ५२ गावांतील शेतकऱ्यांची १० ते १५ किलोमीटरवर असलेल्या पासोडी पाडा येथे जाण्याची पायपीट थांबली आहे.