मुसारणे शाळेची क्षेत्रभेट उत्साहात
वाडा, ता. २५ (बातमीदार) ः जिल्हा परिषद प्राथमिक शाळा मुसारणे येथील विद्यार्थी, शिक्षक व काही पालकांच्या सहभागातून शैक्षणिक क्षेत्रभेट वैशिष्ट्यपूर्ण ठरली. या वेळी ‘पुस्तकाबाहेरचे शिक्षण’ संकल्पनेतून विद्यार्थ्यांच्या सर्वांगीण विकासावर भर दिला आहे.
क्षेत्रभेटीची सुरुवात मेट येथील पंजाब नॅशनल बँक शाखेला भेट देऊन झाली. बँकेतील अधिकाऱ्यांनी विद्यार्थ्यांना बचत खात्याचे महत्त्व, पैसे जमा-काढण्याची पद्धत, डिजिटल व्यवहार तसेच आर्थिक शिस्त याविषयी प्रत्यक्ष मार्गदर्शन केले. आर्थिक साक्षरतेची बीजे लहान वयातच रोवण्याचा हा प्रयत्न स्तुत्य मानला जात आहे. यानंतर विद्यार्थ्यांनी मराडेपाडा येथील श्री छत्रपती शिवाजी महाराज मंदिर येथे भेट देऊन इतिहासाचा सजीव अनुभव घेतला. मंदिर परिसरातील वातावरण, छत्रपती शिवाजी महाराजांच्या पराक्रमाच्या कथा आणि त्यांच्या राष्ट्रनिर्मितीच्या कार्याविषयी सविस्तर माहिती दिली.