नवघरमध्ये शंभर खाटांचे रुग्णालय
राजाराम बाबर यांच्या पाठपुराव्याला यश
विरार, ता. २५ (बातमीदार) ः नवघर प्राथमिक आरोग्य केंद्राच्या सर्वे क्रमांक ५८ वर शंभर खाटांचे सहा मजली रुग्णालय विविध कारणांनी रखडले होते; पण अखेर त्याला यश आले असून रुग्णालय उभारणीला वेग आला आहे.
ठाकरे गटाचे राजाराम बाबर यांनी विविध मान्यवरांशी भेटी घेऊन तसेच लेखी पत्रव्यवहार करून शासनदरबारी रुग्णालयासाठी पाठपुरावा केला होता. तसेच पालकमंत्री गणेश नाईक, आमदार स्नेहा दुबे, माजी आमदार हितेंद्र ठाकूर, माजी खासदार राजेंद्र गावीत, तसेच पालिका आयुक्त यांच्याशी भेट घेऊन रुग्णालयाच्या उभारणीबाबत सकारात्मक चर्चा केली होती. त्यानुसार सार्वजनिक बांधकाम विभागाचे उपकार्यकारी अभियंता संजय यादव यांनी प्रकल्पाबाबत चौकशी करून रीतसर पत्र दिले आहे. त्यामुळे शंभर खाटांचे सुसज्ज रुग्णालय उभारण्याच्या हालचालींना वेग आला आहे.