साकीनाका ९० फूट रस्त्याच्या दुभाजकावर कचऱ्याचा विळखा
घाटकोपर, ता. २५ (बातमीदार) : साकीनाका मेट्रो स्थानक परिसरातील ९० फूट रस्त्याच्या दुभाजकावर मोठ्या प्रमाणात कचरा साचल्याने परिसरात घाणीचे साम्राज्य पसरले आहे. प्लॅस्टिक पिशव्या, अन्नाचा उरलेला कचरा, बांधकाम मलबा आणि घरगुती कचऱ्याचे ढीग दुभाजकावर दिसत आहेत. गजबजलेल्या या मार्गाचे सौंदर्यीकरणासाठी बांधलेले दुभाजकच आता कचरा टाकण्याचे ठिकाण बनले आहे. दुर्गंधीमुळे डास, माश्या व भटक्या प्राण्यांचा वावर वाढला असून, नागरिकांच्या आरोग्यावर परिणाम होण्याची भीती व्यक्त केली जात आहे. “स्वच्छतेच्या घोषणा केल्या जातात; मात्र प्रत्यक्षात परिस्थिती बिकट आहे. नाकावर रुमाल लावून मार्ग काढावा लागतो,” अशी प्रतिक्रिया रिक्षाचालक हनुमंत टाव्हरे यांनी दिली. संबंधित महापालिका विभागाने तत्काळ दखल घेऊन कचरा हटवावा व दोषींवर कारवाई करावी, अशी मागणी नागरिकांकडून करण्यात येत आहे. एल विभागाच्या घनकचरा विभागाशी संपर्क साधण्याचा प्रयत्न झाला; मात्र प्रतिसाद मिळू शकला नाही.