एस. व्ही. रोडवरील अर्धवट काँक्रीटीकरणामुळे धुळीचा त्रास; साफसफाईची मागणी
जोगेश्वरी, ता. ३ (बातमीदार) : अंधेरी पश्चिम येथील एस. व्ही. रोडवरील पोस्ट कार्यालयाजवळ सध्या रस्ता काँक्रीटीकरणाचे काम सुरू आहे. या कामाचा काही भाग पूर्ण झाला असला तरी उर्वरित काम प्रलंबित असल्याने परिसरात मोठ्या प्रमाणात धूळ उडत आहे.
पूर्ण झालेल्या रस्त्याच्या भागावर माती व धुळीचे थर साचले असून सततच्या वाहनांच्या येण्या-जाण्यामुळे ही धूळ हवेत उडत आहे. परिणामी, पादचारी, वाहनधारक आणि स्थानिक नागरिकांना त्रास सहन करावा लागत आहे. दुचाकीस्वारांना घसरगुंडीचा धोका निर्माण झाला असून रस्त्याकडील दुकानदारांनाही धुळीमुळे व्यवसायात अडचणी येत आहेत. विशेषतः सकाळ-संध्याकाळच्या गर्दीच्या वेळेत या मार्गावर रिक्षा, दुचाकी आणि अन्य वाहनांची मोठी वर्दळ असते. अशा परिस्थितीत रस्त्याची नियमित साफसफाई होत नसल्यास श्वसनविकारांसह इतर आरोग्य समस्या निर्माण होण्याची भीती नागरिकांनी व्यक्त केली आहे. महापालिकेने तातडीने पूर्ण झालेल्या रस्त्याच्या भागाची स्वच्छता करून नियमित पाणी फवारणी करावी, तसेच उर्वरित काम वेगाने पूर्ण करावे, अशी मागणी स्थानिक नागरिकांकडून करण्यात येत आहे.