जुईनगर, ता. २६ (बातमीदार) : नवी मुंबई शहरातील ५०० चौरस फुटांपर्यंतच्या घरांना मालमत्ता करात सवलत द्यावी, अशी मागणी नगरसेवक अभिजित देसाई यांनी महापालिकेच्या सभागृहात मांडली. ५०० चौरस फुटांपर्यंतची घरे प्रामुख्याने मध्यमवर्गीय व निम्न मध्यमवर्गीय नागरिकांची असल्याने त्यांना करसवलत दिल्यास मोठा दिलासा मिळू शकतो. महागाई, घरखर्च आणि इतर आर्थिक ताण लक्षात घेता ही मागणी नागरिकांच्या दृष्टीने महत्त्वाची मानली जाते. मात्र, या प्रस्तावाचा महापालिकेच्या उत्पन्नावर परिणाम होऊ शकतो. त्यामुळे सत्ताधारी गट आणि प्रशासन या मागणीवर कोणती भूमिका घेतात, याकडे सर्वांचे लक्ष लागले आहे.