पोलिस भरतीत अपयश; तरुणीची आत्महत्या
अंबरनाथ, ता. २७ (वार्ताहर) : पोलिस भरतीमध्ये अपयश येत असल्याने नैराश्यग्रस्त २६ वर्षीय तरुणीने आत्महत्या केल्याची धक्कादायक घटना अंबरनाथमध्ये उघडकीस आली आहे. आत्महत्येपूर्वी संबंधित तरुणीने आई-वडिलांच्या नावे पत्र लिहिले असून, त्यामधून तिच्या आत्महत्येचे कारण स्पष्ट झाले आहे.
अंबरनाथ पश्चिमेतील जुना भेंडीपाडा परिसरात राहणारी प्रतीक्षा चंद्रशेखर राणे (वय २६) ही गेल्या काही वर्षांपासून पोलिस भरतीची तयारी करत होती; मात्र सातत्याने प्रयत्न करूनही यश न आल्याने ती मानसिक तणावाखाली होती. तिने गुरुवारी (ता. २६) आत्महत्या केली. घटनेची माहिती मिळताच अंबरनाथ पोलिसांनी घटनास्थळी दाखल होत पंचनामा करून मृतदेह उल्हासनगर येथील शासकीय मध्यवर्ती रुग्णालयात शवविच्छेदनासाठी पाठविण्यात आला आहे. याप्रकरणी अंबरनाथ पोलिस ठाण्यात अकस्मात मृत्यूची नोंद करण्यात आली आहे.