पत्नीसमोरच पतीची हत्या
नालासोपारा, ता. २७ (बातमीदार) : वसई-विरार परिसरात गेल्या आठवडाभरापासून हत्यांची मालिका सुरूच असून, गुन्हेगारांना पोलिसांचा धाक उरला आहे की नाही, असा प्रश्न निर्माण झाला आहे. आज पहाटे नालासोपारा पश्चिमेतील हनुमान नगर परिसरात एका तरुणाची निर्घृण हत्या करण्यात आली. विशेष म्हणजे, केवळ सोशल मीडियावर ‘डिस्प्ले पिक्चर’ (डीपी) ठेवण्याच्या किरकोळ कारणावरून हा रक्तरंजित प्रकार घडला. माहितीनुसार, नालासोपारा पश्चिम येथील हनुमान नगरमधील ‘साई निधी अपार्टमेंट’मध्ये ही घटना पहाटे साडेचारच्या सुमारास घडली. इमारतीच्या तळमजल्यावर हसनने आफताबवर चाकूने वार करत त्याची हत्या केली. हा प्रकार आफताबच्या पत्नीसमोरच घडला. डीपीच्या वादातूनच ही घटना घडल्याची प्राथमिक माहिती असून, पोलिसांनी गुन्हा दाखल करून पुढील तपास सुरू केला आहे.