बोईसर, ता. २८ (वार्ताहर) : तारापूर औद्योगिक वसाहतीच्या हरित क्षेत्रांमध्ये रासायनिक पाण्याचा साठा झाल्याने ३२ भूखंडांवरील झाडांचे अस्तित्व धोक्यात आले आहे. त्यामुळे कारखान्यांमधील सांडपाण्याची गळती थांबवण्याची मोठे आव्हान यंत्रणांसमोर आहे.
राज्यातील सर्वात मोठ्या औद्योगिक पट्ट्यांपैकी एक असलेल्या वसाहतीत २,१०० भूखंड आहेत. त्यापैकी १,८०० औद्योगिक तर ३०० निवासी भूखंड आहेत. सध्या १,२०० हून अधिक लघू, मध्यम व मोठे उद्योग तसेच गोदामे कार्यरत आहेत. वाढत्या औद्योगिकीकरणासोबत पर्यावरणीय प्रश्नही अधूनमधून समोर येत आहेत. अशातच काही वर्षांपूर्वी मोठ्या प्रमाणात केलेल्या वृक्षारोपण केलेल्या हरित क्षेत्रातील परिसरात तलावासारखा पाण्याचा साठा निर्माण झाला आहे. अनेक झाडांची मुळे या दूषित पाण्यात बुडाल्याने काहींची झाडांची खोडे कुजू लागली आहेत. तर तलावातील पाण्याला तीव्र दुर्गंधी येत असून काही ठिकाणी रंगातही बदल झाल्याने झाडे मरणपंथाला आल्याने प्रशासनाच्या कार्यपद्धतीवर प्रश्नचिन्ह उपस्थित होत आहे.
-----------------------
ग्रीन झोनमध्ये रासायनिक पाण्याचा साठा होणे, ही गंभीर बाब आहे. दूषित पाण्यामुळे झाडे वाळण्याच्या स्थितीत असून प्रशासनाने तातडीने तपासणी करून कारवाई करावी.
- रूपेश पाटील, पर्यावरणप्रेमी