मराठी राज्यभाषा दिन उत्साहात साजरा
घाटकोपर, ता. २८ (बातमीदार) ः विवेक विद्यालयात मराठी राजभाषा दिन मोठ्या उत्साहात साजरा करण्यात आला. या निमित्ताने आयोजित कार्यक्रमात विद्यार्थ्यांनी विविध मराठी लेखक व कवी यांचा परिचय करून देत त्यांच्या मराठी भाषेच्या विकासातील योगदानावर प्रकाश टाकला.
विद्यार्थ्यांनी काव्यवाचन, लेखवाचन आदी सादरीकरणांद्वारे मराठी भाषेची समृद्ध परंपरा आणि साहित्यवैभव प्रभावीपणे मांडले. कार्यक्रमात शाळेचे मुख्याध्यापक विवेक थोरात यांनी मराठी राजभाषा दिनाचे महत्त्व विशद केले. मराठी ही अभिजात व समृद्ध भाषा असून तिचे जतन आणि संवर्धन करण्यासाठी विद्यार्थ्यांनी वाचनाची सवय जोपासावी, शुद्ध लेखन वाचनाचा सराव करावा आणि दैनंदिन व्यवहारात मराठीचा अभिमानाने वापर करावा, असे त्यांनी मार्गदर्शन केले. शिक्षक व विद्यार्थ्यांच्या संयुक्त नियोजनातून साकारलेला हा कार्यक्रम शिस्तबद्ध व प्रेरणादायी ठरला. मराठी भाषेप्रती अभिमान, आपुलकी आणि जतनाची जाणीव निर्माण करणारा हा उपक्रम सर्वांच्या उत्स्फूर्त सहभागामुळे संस्मरणीय ठरला.