मुलुंडमध्ये राजभाषा गौरव दिन उत्साहात
मुलुंड, ता. २८ (बातमीदार) ः मुलुंडमध्ये मराठी राजभाषा गौरव दिन शुक्रवार (ता. २७) उत्साहपूर्ण वातावरणात साजरा करण्यात आला. यानिमित्ताने मुलुंड येथील सार्वजनिक शिक्षण संस्थेच्या भाषा विभागातर्फे मराठी विश्व या नव्या उपक्रमाच्या संस्थापक कार्यकारी मंडळाची पहिली बैठक पार पडली. संस्थेचे अध्यक्ष डॉ. विवेक देशपांडे यांनी अध्यक्षस्थान भूषविले. बैठकीत मराठी भाषा, साहित्य, संस्कृती आणि पारंपरिक खाद्यसंस्कृतीच्या जतन व प्रसारासाठी विविध उपक्रम राबविण्याबाबत सविस्तर चर्चा झाली.
मराठी साहित्य, कविता आणि ग्रंथांचे पुनर्प्रकाशन, नव्या पुस्तकांचे प्रकाशन आणि १ मे रोजी साजऱ्या होणाऱ्या मराठी राजभाषा दिनानिमित्त विशेष कार्यक्रम निर्णय घेतला. संस्थेचे संस्थापक डॉ. गजानन पुरंदरे आणि नलिनी पुरंदरे यांच्या जयंतीनिमित्त साहित्यिक कार्यक्रम घेण्याचाही प्रस्ताव मांडण्यात आला. बाल साहित्यिकांसाठी कथाकथन व कवितालेखन स्पर्धा, मराठी खाद्यपदार्थ प्रदर्शन, साहित्य संमेलन आणि हास्य कवी संमेलन यांसारखे विविध उपक्रम राबविण्याचे ठरविण्यात आले. तसेच मराठी शाळांचे संवर्धन, पालकांच्या प्रश्नांसाठी व्यासपीठ उपलब्ध करून देणे आणि शासन पातळीवर पाठपुरावा करण्यावरही भर देण्यात आला.