किरकोळ वादातून शाळकरी मुलावर चाकूहल्ला
मुंब्र्यात दोघांविरुद्ध गुन्हा दाखल
ठाणे, ता. १ : मुंब्रा परिसरात किरकोळ वादाचे पर्यवसान रक्तरंजित हल्ल्यात झाल्याची धक्कादायक घटना समोर आली आहे. नमाज अदा करून घरी परतणाऱ्या एका १४ वर्षीय अल्पवयीन मुलावर चाकूने हल्ला करण्यात आला. याप्रकरणी मुंब्रा पोलिसांनी दोन फरार आरोपींविरुद्ध गुन्हा दाखल केला असून, त्यांचा शोध सुरू आहे. मिळालेल्या माहितीनुसार, मोसीन (१४) हा २६ फेब्रुवारी २०२६ला रात्री १०च्या सुमारास कौसा येथील नुरी मशिदीतून नमाज अदा करून मित्र इबादसोबत घरी परतत होता. दुपारी इबाद आणि आरोपी अमान यांच्यात किरकोळ भांडण झाले होते. याच भांडणाचा राग मनात धरून अमान आणि त्याच्या एका साथीदाराने या मुलांना रस्त्यात अडवले.

आरोपी अमान याने मोसीनच्या पाठीवर डाव्या बाजूला चाकूसारख्या धारदार शस्त्राने वार केले. अमानच्या साथीदारानेही या वेळी मुलांना शिवीगाळ करीत लाथाबुक्क्यांनी मारहाण केली. हल्ल्यानंतर दोन्ही आरोपींनी घटनास्थळावरून पळ काढला.
जखमी मोसीनला तातडीने कळवा येथील छत्रपती शिवाजी महाराज रुग्णालयात दाखल करण्यात आले. त्याची प्रकृती आता स्थिर असल्याची माहिती डॉक्टरांनी दिली आहे. मोसीनची बहीण मेहेक शेख (वय २३) यांनी दिलेल्या तक्रारीवरून मुंब्रा पोलिसांनी गुन्हा नोंदवला आहे. वरिष्ठ पोलिस निरीक्षक अनिल शिंदे यांच्या मार्गदर्शनाखाली पोलिस पथक फरार आरोपींचा शोध घेत आहे.