गाव-पाड्यांत उत्साह शिगेला
स्थलांतरित मजूर गावाकडे परतल्याने चैतन्य
विक्रमगड, ता.१(बातमीदार)ः सण-उत्सवांच्या स्वरूपात अनेक बदल झाले असले तरी ग्रामीण भागात होळीचा सण पारंपरिक रुढी-परंपरांसह उत्साहात साजरा केला जात आहे. विक्रमगड तालुक्यातही सणानिमित्त स्थलांतरीत गावाकडे परतले आहेत. त्यामुळे सर्वत्र उत्साह संचारला आहे.
विक्रमगड तालुक्यात अंदाजे ७०० ते ८०० होळ्या उभारल्या जाणार आहेत. बहुतांश ग्रामीण भागात ‘आजही एक गाव, एक होळी’ ही परंपरा जपली जात आहे. गावाच्या मध्यभागी ठरलेल्या माळावर लाकूड, पेंढा, गवत, बांबू आदी साहित्य जमा करून सामूहिकरीत्या होळी उभारली जाते. होळीच्या दोन दिवस आधी महिलांकडून तांदळाच्या पिठाचे पापड तयार केले जातात. होळीच्या दिवशी आणि पूजेच्या प्रसंगी पुरणपोळीचा नैवेद्य दाखवण्याची परंपरा आहे. लहान मुले आणि तरुण मंडळी घराघरांतून साहित्य गोळा करून होळीच्या ठिकाणी जमा करतात. रात्री चंद्र उगवल्यानंतर महिला नटून-थटून, तर लहान मुले गळ्यात साखरेच्या गाठींच्या माळा घालून ढोल-ताशांच्या गजरात आरत्या म्हणत होळीस्थळी जमतात.
-------------------
सुख-शांतीची प्रार्थना
गावातील रोगराई, दुःख, वाईट प्रवृत्ती यांचा नाश व्हावा आणि कुटुंबात सुख-शांती नांदावी, सुदृढ आयुष्य लाभावे या भावनेने होळीला अर्पण करण्यात येते. श्रद्धा, परंपरा आणि सामूहिक एकतेचे प्रतीक असलेला हा सण विक्रमगड तालुक्यात आजही तितक्याच उत्साहात भक्तिभावाने साजरा होत आहे. रोजगारासाठी शहरांकडे स्थलांतरित आदिवासी मजूर वर्गही होळीच्या निमित्ताने गावाकडे परतला आहे.