कोपरखैरणेत संत तुकाराम महाराज बीज महोत्सव
हनुमान मंदिरात ३५ वर्षांची परंपरा; भजन-कीर्तन व महाप्रसादाचे आयोजन
तुर्भे, ता. १ (बातमीदार) : कोपरखैरणे सेक्टर-१९ येथील श्री हनुमान मंदिरात श्री संत ज्ञानेश्वर माऊली वारकरी संप्रदाय मंडळ यांच्या वतीने गुरुवारी (ता.५) श्री संत तुकाराम महाराज बीज महोत्सव भक्तिभावात साजरा करण्यात येणार आहे. ह.भ.प. वै. गुरुवर्य एकनाथ म्हात्रे महाराज यांच्या कृपाआशीर्वाद व मार्गदर्शनाखाली गेली ३५ वर्षे हा धार्मिक सोहळा सातत्याने आयोजित केला जात असून परिसरातील भाविकांमध्ये याला विशेष महत्त्व आहे.
उत्सवानिमित्त सकाळी ८ ते ९ या वेळेत वारकरी भजनी मंडळाचे भजन होणार असून सकाळी १० ते १२ दरम्यान बबन महाराज नाईक यांचे कीर्तन रंगणार आहे. दुपारी भाविकांसाठी महाप्रसादाचे आयोजन करण्यात आले आहे. कृष्णा एकनाथ म्हात्रे महाराज व जयवंता कृष्णा म्हात्रे यांच्या माध्यमातून जपली गेलेली ही परंपरा यंदाही उत्साहात साजरी होणार असून भाविकांनी मोठ्या संख्येने उपस्थित राहावे, असे आवाहन आयोजकांनी केले आहे.