वाड्यात कचरामुक्तीचा निर्धार
वाडा, ता.१(बातमीदार)ः डॉ. नानासाहेब धर्माधिकारी प्रतिष्ठान रेवदंडा, अलिबाग जि. रायगड यांच्या मार्फत पद्मश्री डॉ.आप्पासाहेब धर्माधिकारी आणि रायगडभूषण सचिनदादा धर्माधिकारी यांच्या संकल्पनेतून महास्वच्छता अभियान हाती घेतले आहे. या अभियाना अंतर्गत वाडा तालुक्यातील श्रीसदस्यांनी कुडूस, खंडेश्वरी नाका परिसरात स्वच्छता केली.
डॉ.नानासाहेब धर्माधिकारी प्रतिष्ठाण मार्फत गेल्या अनेक वर्षांपासून निरूपणातून आदर्श समाज घडावा, यासाठी योगदान देत आहे. तसेच प्रतिष्ठानमार्फत रक्तदान शिबीर, स्वच्छता अभियान, आरोग्य, शैक्षणिक साहित्य वाटप, वुक्ष लागवड व संवर्धन, निर्माल्य संकलन व खत निर्मिती, बंधारे निर्मिती असे अनेक विविध समाजोपयोगी उपक्रम राबविले जात आहेत. याच अनुषंगाने राबवलेल्या स्वच्छता अभियानात खासदार डॉ.हेमंत सवरा, काँग्रेसचे जिल्हाध्यक्ष प्रफुल पाटील, नगरसेविका भारती सपाटे, प्रगती वलटे, नगरसेवक हर्षल खांबेकर सहभागी झाले होते.