जोगेश्वरीत मराठी भाषा गौरव दिन उत्साहात
स्वाक्षरी मोहिमेला उत्स्फूर्त प्रतिसाद

जोगेश्वरी, ता. ३ (बातमीदार) ः जोगेश्वरी येथील भाजप प्रभाग क्रमांक ७३ मध्ये २७ फेब्रुवारीला मराठी भाषा गौरव दिन मोठ्या उत्साहात साजरा करण्यात आला. मराठी भाषेचा अभिमान जागविणे आणि दैनंदिन व्यवहारात मराठीचा वापर वाढावा, या उद्देशाने विशेष ‘मराठी स्वाक्षरी मोहीम’ राबविण्यात आली.
कार्यक्रमस्थळी मराठी भाषा गौरव दिनाचे फलक लावून परिसर मराठीमय करण्यात आला होता. ज्येष्ठ नागरिकांसह शाळकरी मुला-मुलींनी मोठ्या उत्साहाने मोहिमेत सहभाग घेत मराठीत स्वाक्षऱ्या केल्या. आपल्या मातृभाषेबद्दल अभिमान व्यक्त करत मराठीचा जप, संवर्धन आणि प्रसार करण्याचा संकल्प उपस्थितांनी केला.
या उपक्रमामुळे परिसरात मराठी भाषेबाबत जागरूकता निर्माण झाली असून नागरिकांनी अशा उपक्रमांचे स्वागत केले. मराठी भाषेचे जतन आणि प्रसार करण्यासाठी पुढील काळातही विविध कार्यक्रम राबविण्याचा निर्धार आयोजकांनी व्यक्त केला.