बाळगंगा प्रकल्पग्रस्तांचे उपोषण स्थगित
पेण, ता. ४ (वार्ताहर) : पेण तालुक्यातील जावळी परिसरातील बाळगंगा धरण प्रकल्पग्रस्त शेतकरी प्रांताधिकारी कार्यालयासमोर बेमुदत उपोषणाला बसले होते. त्यांच्या मागण्यांबाबत चर्चा करण्यासाठी खासदार सुनील तटकरे यांनी भेट देत पुनर्वसन मंत्री मकरंद पाटील यांच्याशी दूरध्वनीवर संवाद साधला. ६ मार्च रोजी मंत्रालयात संबंधित अधिकाऱ्यांची संयुक्त बैठक घेण्याचे आश्वासन देण्यात आले. मागण्या मान्य न झाल्यास स्वतः उपोषणाला बसण्याचा इशाराही तटकरे यांनी दिला. त्यानंतर प्रकल्पग्रस्तांनी बुधवारी सहाव्या दिवशी नारळपाणी घेऊन उपोषण तात्पुरते स्थगित केले.