बिबट्याची दहशत; हल्ल्यात तीन जनावरांचा मृत्यू

कर्जत, ता. ५ (बातमीदार) : कर्जत तालुक्यातील तुंगी गावात आज पहाटेच्या सुमारास बिबट्याने शेतकऱ्याच्या गोठ्यात घुसून तीन गोवंशीय जनावरांवर हल्ला केल्याची घटना घडली. या हल्ल्यात दोन गोऱ्हे आणि एक कालवड मृत्युमुखी पडली असून, शेतकरी हनुमान शिवाजी सुपे यांचे आर्थिक नुकसान झाले आहे. मिळालेल्या माहितीनुसार, बुधवारी (ता. ४) मध्यरात्री जनावरे गोठ्यात बांधलेली असताना हिंस्त्र प्राण्याने गोठ्याच्या खिडकीतून उडी मारून आत प्रवेश करून जनावरांवर हल्ला केल्याचे म्हटले जात आहे. या प्रकारामुळे परिसरात भीतीचे वातावरण पसरले आहे.
वनाधिकारी समीर शिंदे यांच्या मार्गदर्शनाखाली खांडस येथील वनपाल व राउंड स्टाफ यांनी पशुवैद्यकीय अधिकाऱ्यांसह घटनास्थळी भेट देऊन पंचनामा केला व नुकसानीचा अहवाल तयार केला. तसेच ग्रामस्थांना वन्यप्राण्यांपासून बचावासाठी आवश्यक सूचना देण्यात आल्या. ग्रामस्थांनी जनावरे बंदिस्त गोठ्यात ठेवावीत, परिसरात पुरेसा प्रकाश ठेवावा, लहान मुलांना संध्याकाळनंतर घराबाहेर जाऊ देऊ नये तसेच रात्री बाहेर पडताना बॅटरी घेऊन किंवा समूहानेच बाहेर पडावे, यापूर्वी झालेल्या नुकसानीची रक्कम लाभार्थ्यांला वन विभागामार्फत देण्यात आलेली आहे. त्यामुळे हल्ला करणाऱ्या वन्यप्राण्याला कोणतेही नुकसान करू नये, असे आवाहन परिक्षेत्र वनाधिकारी समीर शिंदे यांनी केले आहे.