परीक्षेसाठी आलेल्या पुण्यातील तरुणाचा मोबाईल चोरीला
सकाळ वृतसेवा
ठाणे, ता. ७ : मुंबईत परीक्षा देण्यासाठी आलेल्या पुण्यातील एका तरुणाचा मोबाईल फोन ठाणे रेल्वे स्थानकावर चोरीला गेल्याची घटना घडली. याप्रकरणी ठाणे लोहमार्ग पोलिस ठाण्यात तक्रार दाखल करण्यात आली असून पोलिसांकडून पुढील तपास सुरू आहे.
पुण्यातील गुरूवार पेठ येथे राहणारा ओंकार युवराज देवकर (वय २८) हा तरुण एमपीएससीची तयारी करत आहे. ५ मार्च रोजी महाराष्ट्र जीवन प्राधिकरण विभागाची परीक्षा देण्यासाठी तो मुंबईतील पवई येथे आला होता. परीक्षा संपल्यानंतर तो पुन्हा पुण्याकडे जाण्यासाठी रात्री सुमारे ८.५२ वाजण्याच्या सुमारास ठाणे रेल्वे स्थानकाच्या फलाट क्रमांक ७ वर आला.
त्यावेळी हुबळी एक्सप्रेस गाडीत मोठी गर्दी होती. त्यामुळे तो मोटरमनच्या बाजूच्या दुसऱ्या जनरल डब्यात चढत असताना त्यांच्या पँटच्या उजव्या खिशात ठेवलेला मोबाईल फोन अनोळखी चोरट्याने चोरून नेला. चोरीला गेलेल्या मोबाईल फोनची किंमत सुमारे १८ हजार रुपये असल्याचे तक्रारीत नमूद करण्यात आले आहे.
या प्रकरणी ठाणे लोहमार्ग पोलिस ठाण्यात गुन्हा नोंदविण्यात आला असून वरिष्ठ पोलिस निरीक्षक अर्चना दुसाने यांच्या मार्गदर्शनाखाली अधिक तपास सुरू आहे.