धोकादायक कंपन्यांच्या तपासणीचे आदेश
भगेरिया कंपनीतील वायू गळतीनंतर प्रशासनाची कारवाई

पालघर, ता. ७ ः तारापूर एमआयडीसीमधील एका उत्पादक कंपनीतील वायू गळतीमुळे परिसरात प्रचंड भीतीचे वातावरण पसरले होते. या घटनेचे गांभीर्य लक्षात घेता पुढील धोका टाळण्यासाठी धोकादायक कंपन्यांच्या तपासणीचे आदेश जिल्हाधिकारी डॉ. इंदुराणी जाखड यांनी आज औद्योगिक सुरक्षा संचालनालय आणि संबंधित यंत्रणांना दिले आहेत.
भगेरिया (पूर्वीची झेनिथ) या रासायनिक उत्पादन कंपनीमध्ये ओलियम वायू गळतीमुळे गावात प्रचंड भीती निर्माण झाली होती. ओलियमचा वापर करून भगेरिया इंडस्ट्रीजमध्ये एच-ॲसिड उत्पादन करण्याची युनिट बंद करण्याच्या सूचना प्रदूषण नियंत्रण मंडळाने संबंधित कंपनी व्यवस्थापनाला घडलेल्या घटनेनंतर दिले आहेत. तर वायू गळतीच्या ठिकाणी सुरक्षिततेच्या दृष्टिकोनातून आवश्यक उपाययोजनांची अंमलबजावणी करून औद्योगिक सुरक्षा विभागाकडून त्याचे प्रमाणीकरण केल्यानंतरच उत्पादन पुन्हा सुरू करण्याची परवानगी देणार असल्याचे प्रदूषण नियंत्रण मंडळाच्या तारापूर कार्यालयाकडून सांगण्यात आले.
.........
घातक उद्योगांचे सर्वेक्षण
तारापूरमधील धोकादायक आणि संभाव्य घटना घडण्याची शक्यता असलेल्या घातक उद्योगांचे सर्वेक्षण करून उत्पादन प्रक्रियेतील तसेच रासायनिक हाताळणीसंदर्भात असणाऱ्या त्रुटींचा अभ्यास करणे व प्रतिबंधात्मक उपाययोजना आखण्याबाबतचे हे निर्देश आहेत. सर्वेक्षण केल्यानंतरचा अहवाल महिनाभरात सादर करण्याचे आदेश दिल्याचे जिल्हाधिकारी जाखड यांनी पत्रकार परिषदेत सांगितले. औद्योगिक सुरक्षा आणि आरोग्य विभागाकडे पालघर जिल्ह्यात मर्यादित मनुष्यबळ असून, विशेष सर्वेक्षण करण्यासाठी राज्यभरातून १४ अधिकारी हंगामी पद्धतीने विशेष सर्वेक्षण करीत असल्याची माहिती या विभागाकडून देण्यात आली.

घटना कशी घडली?
रोजच्या वापरासाठी असणाऱ्या ओलियमच्या टाक्यांचा लोखंडी आधार गंजून कमकुवत झाला होता. दरम्यान, हा आधार निखळल्याने ओलियमच्या टाक्या कलंडल्या. यामुळे टाकीचे पातळी दर्शविणारे उपकरण आणि टाकीचे नोझल तुटल्याने त्यामधून ओलियमची गळती सुरू झाली. अपघात घडला त्या वेळी दोन टाक्यांमध्ये १,२०० लिटर ओलियम असल्याचा अंदाज व्यक्त करण्यात येत आहे. ओलियम हवेच्या संपर्कात आल्यानंतर कंपनीसह एक किमी परिसरात वायूचे लोट पसरले. त्यामुळे भीतीसदृश वातावरण निर्माण होऊन सर्वत्र पळापळ झाली.