महिलांनी आत्मनिर्भर होऊन नेतृत्वाची भूमिका पार पाडावी
महापौर अ‍ॅड. हर्षाली चौधरी-थविल यांचे प्रतिपादन
कल्याण, ता. ८ (वार्ताहर) : महिलांनी आत्मनिर्भर होऊन समाजात नेतृत्वाची भूमिका पार पाडावी, असे आवाहन महापौर अ‍ॅड. हर्षाली चौधरी-थविल यांनी केले.जागतिक महिला दिनानिमित्त पालिकेच्या महिला व बाल कल्याण विभागामार्फत आंबिवली येथील लाईटहाऊस कौशल्य विकास केंद्रात विशेष कार्यक्रम पार पडला. यावेळी त्या बोलत होत्या.
याप्रसंगी हर्षाली चौधरी-थविल व आयुक्त अभिनव गोयल यांची प्रमुख उपस्थिती होती. यासोबतच शहरातील विविध राजकीय पक्षांचे गटनेते, स्थानिक लोकप्रतिनिधी, अतिरिक्त आयुक्त व इतर अधिकारी आणि नागरिक मोठ्या संख्येने उपस्थित होते.
या कार्यक्रमात आंबिवली लाईटहाऊस कौशल्य विकास केंद्रात प्रशिक्षण घेणाऱ्या महिला विद्यार्थिनींनी आपले अनुभव आणि मनोगत व्यक्त केले. कौशल्य प्रशिक्षणामुळे आत्मविश्वास वाढला असून रोजगाराच्या संधी निर्माण होत असल्याचे त्यांनी सांगितले. मान्यवरांनी आपल्या भाषणात महिलांच्या शिक्षण, कौशल्य विकास आणि आर्थिक स्वावलंबनाचे महत्त्व अधोरेखित केले. या उपक्रमाच्या माध्यमातून महिलांना स्वावलंबी बनविणे, त्यांना कौशल्य प्रशिक्षण देऊन रोजगाराच्या संधी उपलब्ध करून देणे आणि महिला सक्षमीकरणाला चालना देणे हा मुख्य उद्देश असल्याचे अभिनव गोयल यांनी सांगितले.