लग्नाच्या भूलथापा देऊन पीडितेवर अत्याचार
आरोपीला १४ वर्षांचा सश्रम कारावास
अलिबाग, ता. ८ (वार्ताहर) : लग्नाच्या भूलथापा देऊन पीडितेवर बलात्कार केल्याप्रकरणी आरोपी नागेश पोपट गावडे (४३, रा. पोलिस मुख्यालय, अलिबाग; मूळ विद्यानगर, माळेगाव, ता. बारामती, जि. पुणे) याला अतिरिक्त सत्र न्यायाधीश एस. आर. तिवारी यांनी १४ वर्षांची सश्रम कारावासाची शिक्षा सुनावली. या खटल्याचा निकाल मंगळवारी (ता. २४) देण्यात आला.
हा गुन्हा जुलै २०१३ ते डिसेंबर २०१४ या कालावधीत घडला. आरोपी व फिर्यादी हे दोघेही पोलिस शिपाई असून, अलिबाग पोलिस मुख्यालयात कार्यरत होते. प्रशिक्षणादरम्यान आरोपीने फिर्यादीशी जवळीक साधून आपले पहिले लग्न झाले असल्याचे लपवून तिला लग्नाच्या भूलथापा दिल्या. त्यानंतर तिच्याशी वारंवार शारीरिक संबंध ठेवले आणि त्याचे व्हिडिओ तयार करून ब्लॅकमेल केले. तसेच आर्थिक मदत मागून फसवणूकही केली. फिर्यादीने संबंध तोडण्याचा प्रयत्न केल्यावर आरोपीने तिला मारहाण करून जिवे मारण्याची धमकी दिली. अखेर पीडितेने अलिबाग पोलिस ठाण्यात तक्रार दाखल केली.
या प्रकरणात अतिरिक्त सरकारी अभियोक्ता कोमल राठोड यांनी सरकार पक्षातर्फे १७ साक्षीदार तपासले. तपास अधिकारी बी. बी. चौधरी यांनी तपास पूर्ण केला. दोन्ही बाजूंचा युक्तिवाद ऐकून न्यायालयाने आरोपीला १४ वर्षांची सश्रम कारावासाची शिक्षा सुनावली.