डहाणू-चर्चगेट महिला स्पेशल लोकल सुरू करावी
डहाणू-विरार प्रवासी महिला संघाची मागणी

पालघर, ता. ९ (बातमीदार) : पश्चिम रेल्वेने, सकाळ व संध्याकाळच्या गर्दीच्या वेळे डहाणू-चर्चगेट व चर्चगेट-डहाणू महिला स्पेशल लोकल सुरू करावी, अशी मागणी डहाणू-विरार प्रवासी महिला संघाच्या वतीने करण्यात आली आहे. याबाबत शिवसेनेचे प्रवक्ते केदार काळे यांनी पश्चिम रेल्वेच्या महाव्यवस्थापकांना याबाबत एक निवेदनही दिले आहे.
याबाबत काळे म्हणाले की, सध्या गर्दीच्या वेळेस डहाणू, वाणगाव, बोईसर, उमरोळी, पालघर, केळवे रोड, सफाळे, वैतरणा या रेल्वे स्थानकवरून प्रवास करणाऱ्या दैनंदिन महिला रेल्वे प्रवाशांना गर्दीचा खूप त्रास होत आहे. संपूर्ण दिवस नोकरीनिमित्त, शिक्षणानिमित्त, कामानिमित्त या महिला घरापासून दूर राहतात. सकाळी कामावर जाताना घरातील स्वयंपाक करून निघावे लागते, तर रात्री घरी आल्यानंतर त्यांना रात्रीच्या जेवणाची तयारी करावी लागते. अशात त्यांचा प्रवास थोडा तरी सुखकारक व्हावा व त्यांना प्रवासात थोडा आराम मिळावा, म्हणून महिला दिनाचे औचित्य साधून पश्चिम रेल्वेने गर्दीच्या वेळेस सकाळ-संध्याकाळ डहाणू-चर्चगेट व चर्चगेट-डहाणू महिला स्पेशल लोकल सुरू करावी. तसेच या विषयात खासदार व आमदार यांनीही लक्ष घालावे, अशी मागणी त्यांनी केली आहे.