मुरबाड (वार्ताहर) : वाढदिवसानिमित्त होणारा अनावश्यक खर्च आणि पार्ट्यांची संस्कृती बाजूला सारत भाजप ओबीसी युवा मोर्चाचे जिल्हा सरचिटणीस गुरुनाथ कराळे यांनी एक आदर्श निर्माण केला आहे. आपल्या वाढदिवसानिमित्त त्यांनी गावातील कोरावळे शाळेतील पहिली ते आठवीतील २१६ विद्यार्थ्यांना शालेय साहित्याचे वाटप करून मदतीचा हात दिला. शाळेच्या सभागृहात शुक्रवारी (ता. ६) हा कार्यक्रम उत्साहात पार पडला. या उपक्रमांतर्गत विद्यार्थ्यांना दप्तर, चप्पल, चटई आणि वह्या अशा दैनंदिन गरजेच्या वस्तूंचे वाटप करण्यात आले. शैक्षणिक साहित्य मिळाल्याने विद्यार्थ्यांच्या चेहऱ्यावर आनंद झळकला. या वेळी शाळा व्यवस्थापन समितीच्या वतीने कराळे यांचा सत्कार करण्यात आला. कार्यक्रमाला समितीचे अध्यक्ष मोतीराम हरड, ग्रामपंचायत सदस्या वृषाली धुमाळ, अंगणवाडी सेविका रेश्मा शिंगोळे, मुख्याध्यापिका सीमा सोनवणे यांच्यासह शिक्षक, माजी विद्यार्थी आणि पालक मोठ्या संख्येने उपस्थित होते.