भिवंडी, ता. ९ (वार्ताहर) : भिवंडीतून अफूची बेकायदा वाहतूक करणाऱ्या एका नशेच्या सौदागराला नारपोली पोलिसांनी अटक केली असून त्याचे दोन साथीदार फरार झाले आहेत. राकेशकुमार भवरलाल गोदारा (वय ३०, रा. जोधपूर) असे अटक आरोपीचे नाव आहे.
पोलिसांनी दिलेल्या माहितीनुसार, ओवळीखिंड ते माणकोली मार्गावर अमली पदार्थांची वाहतूक होणार असल्याची गुप्त माहिती नारपोली पोलिसांना मिळाली होती. त्यानुसार पोलिसांनी सापळा रचला असता राकेशकुमार गोदारा आणि त्याचे दोन साथीदार अफूची बेकायदा वाहतूक करताना आढळून आले. पोलिसांनी आरोपीकडून अफूच्या वाहतुकीसाठी वापरलेली दोन वाहने जप्त केली. तसेच १५१ किलो वजनाचे सुकलेल्या अफूचे बोंडे व त्याचा चुरा असा सुमारे ३९ लाख ९८ हजार ३७५ रुपये किमतीचा अमली पदार्थही जप्त करण्यात आला. याप्रकरणी हवालदार किशोर भामरे यांच्या फिर्यादीवरून तिघांविरुद्ध नारपोली पोलिस ठाण्यात एनडीपीएस कायद्यान्वये गुन्हा दाखल करण्यात आला आहे. राकेशकुमार याला अटक केली असून त्याचे दोन साथीदार फरार झाले आहेत. पोलिसांकडून त्यांचा शोध सुरू आहे.