अपघातात भिवंडीतील
दोन रिक्षाचालकांचा मृत्यू
भिवंडी, ता. ९ (वार्ताहर) ः मुंबई-नाशिक महामार्गावर अज्ञात वाहनाने रिक्षाला दिलेल्या धडकेत भिवंडीतील दोन रिक्षाचालकांचा सोमवारी (ता. ९) मृत्यू झाला. रिक्षाचालक राजकुमार गुप्ता (४०) आणि महेंद्र केसरवानी (३९) अशी अपघातात ठार झालेल्यांची नावे आहेत. या घटनेने घुंगट नगर परिसरात शोककळा पसरली असून, हळहळ व्यक्त होत आहे. या घटनेची माहिती मिळताच तालुका पोलिसांनी घटनास्थळी धाव घेत पंचनामा केला असून, अज्ञात वाहनचालकाविरुद्ध गुन्हा दाखल करण्यात आला आहे.
मिळालेल्या माहितीनुसार, भिवंडी शहरातील घुंघट नगर परिसरात राहणारे रिक्षाचालक राजकुमार आणि महेंद्र हे दोघेही रिक्षाने भिवंडी बायपास मार्गे सोनाळेच्या दिशेने जात होते. दरम्यान, त्यांची रिक्षा मुंबई-नाशिक महामार्गावरील सोनाळे हद्दीत पोहोचताच मागून आलेल्या एका अज्ञात वाहनाने रिक्षाला जोरादार धडक दिली. ही धडकेने दोघे चालक रस्त्यावर फेकले गेले आणि गंभीर जखमी झाले. घटनेनंतर परिसरातील स्थानिक नागरिकांनी तत्काळ दोन्ही जखमींना रुग्णालयात दाखल केले. मात्र, डॉक्टरांनी तपासणी करून दोघांनाही मृत घोषित केले.