आर्थिक व्यवहारांचे विद्यार्थ्यांना धडे
पालघर, ता.१० ः शालेय जीवनातच आर्थिक व्यवहारांचे धडे आणि दैनंदिन जीवनातील व्यवहार समजावे, या उद्देशाने विद्यार्थिवर्गांसाठी आनंददायी शनिवार उपक्रमाअंतर्गत जिल्हा परिषद शाळा वेवूर येथे बाल आनंद बाजार भरवण्यात आला होता. या उपक्रमात विद्यार्थ्यांनी उत्साहाने सहभाग घेतला. विद्यार्थ्यांमधील व्यावसायिक कौशल्यांचे दर्शन उपक्रमात पाहायला मिळाले. आनंद बाजारामध्ये विद्यार्थ्यांनी विक्रीसाठी विविध खाद्यपदार्थ ठेवले होते. विद्यार्थ्यांनी परसबागेत स्वतःपिकवलेला, विक्रीसाठी ठेवलेला सेंद्रिय भाजीपाला कार्यक्रमाचे आकर्षण ठरले. विद्यार्थीच नव्हे, तर शाळा व्यवस्थापन समितीचे सदस्य, पालक संघाचे सदस्य आणि शाळेतील प्रशिक्षणार्थी यांनीही मेळाव्यात सक्रिय सहभाग नोंदवला. पालकांनी विद्यार्थ्यांकडून वस्तू खरेदी करून त्यांना प्रोत्साहित केले. या प्रात्यक्षिक अनुभवातून मुलांना नफा-तोटा, हिशोब आणि ग्राहक संवाद या विषयांचे थेट शिक्षण मिळाले. या उपक्रमाचे नियोजन आणि मार्गदर्शन शाळेच्या मुख्याध्यापिका अजनी राऊत यांनी केले.