आयआयटी मुंबईमध्ये शिवजयंती उत्साहात

मुंबई, दि. ११ : इंडियन इंस्टीट्युट ऑफ टेक्नॉलॉजी बॉम्बे येथे लोकअधिकार समिती आणि विद्यार्थी सांस्कृतिक विभागाच्या संयुक्त विद्यमाने छत्रपती शिवाजी महाराज यांच्या ३९५ व्या जयंतीनिमित्त विशेष कार्यक्रमाचे आयोजन करण्यात आले होते. कार्यक्रमाचे प्रमुख पाहुणे म्हणून इतिहास अभ्यासक वैभव पुरंदरे तसेच प्रसिद्ध चित्रपट दिग्दर्शक संतोष मांजरेकर उपस्थित होते.
या प्रसंगी संतोष मांजरेकर यांनी त्यांच्या गाजलेल्या मराठी चित्रपट ‘मी शिवाजीराजे भोसले बोलतोय’बद्दल संवाद साधत चित्रपटामागील विचार आणि संकल्पना विद्यार्थ्यांसमोर मांडल्या. वैभव पुरंदरे यांनी शिवरायांच्या कार्याचा आणि नेतृत्वाचा वारसा नव्या पिढीपर्यंत पोहोचवण्याची गरज व्यक्त केली. कार्यक्रमास विद्यार्थी, प्राध्यापक आणि कर्मचारी मोठ्या संख्येने उपस्थित होते. कार्यक्रमामुळे विद्यार्थ्यांमध्ये शिवचरित्राबद्दल अभिमान आणि प्रेरणा निर्माण झाली.