मोखाड्यातील विद्यार्थी इस्रो भेटीवर
पालघर शिक्षण विभागाचा विशेष उपक्रम
मोखाडा, ता. १४ (बातमीदार)ः आदिवासी, दुर्गम भागातील विद्यार्थ्यांमध्ये विज्ञानाची आवड निर्माण व्हावी तसेच अंतराळ विज्ञानाबाबत प्रत्यक्ष अनुभव मिळावा, या उद्देशाने पालघर शिक्षण विभागाने (जिल्हा परिषद) विशेष उपक्रम हाती घेतला आहे. या उपक्रमांतर्गत मोखाडा तालुक्यातील सहा विद्यार्थ्यांची भारतीय अंतराळ संशोधन संस्था (इस्रो) येथे शैक्षणिक भेट घेणार आहेत. त्यामुळे विद्यार्थ्यांना प्रत्यक्ष अंतराळ अनुभवण्याची संधी आहे.
इस्रो भेटीसाठी मोखाडा तालुक्यातून जिल्हा परिषद शाळा डोलारा येथे स्वरा पालवे (७वी), शेरीचा पाडा येथील इयत्ता सातवीतील विद्यार्थी साईनाथ वाजे, आठवी इयत्तेतील ध्रुव घाटाळ, जिल्हा परिषद केंद्रशाळा बेरिस्ते येथील यश जाधव (इयत्ता ७वी), जिल्हा परिषद शाळा करोळचे शालिनी गिरे, निशा खडके (इयत्ता ८ वी) आणि जिल्हा परिषद शाळा शेरीचा पाड्याचे प्राथमिक शिक्षक युवराज महाले यांची निवड झाली आहे. १२ ते १५ मार्चदरम्यान या भेटीचे आयोजन करण्यात आले आहे. या उपक्रमामुळे आदिवासी व अतिदुर्गम भागातील गुणवंत विद्यार्थ्यांना इस्रो भेटीची संधी उपलब्ध करून दिली आहे. या उपक्रमामुळे दुर्गम भागातील विद्यार्थ्यांमध्ये आत्मविश्वास वाढणार आहे.
----------------------------------------------
विज्ञानाची प्रत्यक्ष ओळख
या भेटीदरम्यान विद्यार्थ्यांना उपग्रह प्रक्षेपण प्रक्रिया, अंतराळ संशोधनातील आधुनिक तंत्रज्ञान, विविध वैज्ञानिक प्रयोग, इस्रोच्या संशोधन कार्याची माहिती तज्ज्ञांकडून दिली जाणार आहे. यामुळे विद्यार्थ्यांना अंतराळ विज्ञानाची प्रत्यक्ष ओळख होणार असून, विज्ञान आणि तंत्रज्ञान क्षेत्राबद्दल त्यांच्यात अधिक उत्सुकता निर्माण होण्याची अपेक्षा व्यक्त केली जाते. मोखाडा तालुक्यातील विद्यार्थ्यांना मिळालेली ही संधी प्रवासात महत्त्वाची ठरणार असून, अंतराळ संशोधन क्षेत्रातही भविष्यात योगदान देऊ शकतील, अशी अपेक्षा आहे.