बांधकामाच्या वेळा निश्चित करा
भाजपच्या नगरसेविकेची मागणी
सकाळ वृत्तसेवा
मुंबई, ता. १४ ः मुंबईतील वाढत्या प्रदूषणावर नियंत्रण मिळवण्यासाठी बांधकामाच्या वेळेवर बंधन घालण्यात यावे. सकाळी ७ ते सायंकाळी ७ याच वेळेत बांधकामांना परवानगी देण्यात यावी, अशी मागणी भाजपच्या नगरसेविका अलका केरकर यांनी केली आहे.

मुंबईत २,२५० हून अधिक बांधकामे तसेच मेट्रो, एमएमआरडीए प्राधिकरण अशा विविध प्राधिकरणांची कामे सुरू आहेत. बांधकामासाठी खोदकाम होत असताना मुंबईकरांना आवाजाचा त्रास सहन करावा लागत आहे. तर दुसरीकडे वायू प्रदूषणात वाढ होत आहे. रात्रीच्या वेळी बांधकाम सुरू असल्याचे दिसून येते. मुंबईत सुरू असलेल्या बांधकामांमुळे वायू प्रदूषणात वाढ होत असल्याचे महापौर रितू तावडे यांनी पालिका मुख्यालयात आयोजित पत्रकार परिषदेत स्पष्ट केले होते.

या कामांमुळे वायू प्रदूषणात भर पडत असून ध्वनिप्रदूषणातही वाढ होत आहे. तसेच या कामांमुळे होणाऱ्या आवाजाचाही स्थानिकांना त्रास होतो. त्यामुळे या कामांच्या वेळेत बदल करण्याची मागणी भाजपच्या नगरसेविका अलका केरकर यांनी ठरावाच्या सूचनेद्वारे केली आहे. केरकर यांची ठरावाची सूचना सभागृहाच्या पटलावर या महिन्यात ठेवण्यात येणार आहे. सभागृहाने मान्यता दिल्यानंतर प्रशासन याची अंमलबजावणी करणार का, हे पुढील काही दिवसांत स्पष्ट होईल.
--------------