पालिकेत स्थायी समिती सभापती निवडीसाठी १८ मार्चला विशेष सभा
पनवेल, ता. १५ (बातमीदार) : पनवेल महापालिकेतील स्थायी समिती आणि महिला-बालकल्याण समितीच्या सभापती निवडीचा मुहूर्त अखेर ठरला आहे. येत्या बुधवारी (ता. १८) या समित्यांच्या सभापती निवडीसाठी विशेष सभांचे आयोजन करण्यात आले आहे. या निवडीकडे संपूर्ण राजकीय वर्तुळाचे लक्ष लागले असून, नवीन सभापती कोण होणार, याबाबत कमालीची उत्सुकता निर्माण झाली आहे.
पनवेल येथील क्रांतिवीर वासुदेव बळवंत फडके नाट्यगृहात ही विशेष सभा पार पडणार आहे. या सभेचे अध्यक्षस्थान ठाणे जिल्हाधिकारी तथा पीठासीन अधिकारी डॉ. श्रीकृष्णनाथ पांचाळ भूषवणार आहेत. दोन्ही समित्यांच्या सभापतींची निवड समिती सदस्यांमधून करण्यात येणार आहे. या प्रक्रियेसाठी नामनिर्देशन, अर्जांची छाननी आणि आवश्यकतेनुसार मतदानाची प्रक्रिया पार पाडली जाणार असल्याची माहिती पालिका प्रशासनाकडून दिली आहे. १८ मार्चला होणाऱ्या या विशेष सभेमुळे पनवेलमधील राजकीय समीकरणे अधिक स्पष्ट होणार आहेत.